الأحد , 26 مارس 2017
آخر الموضوعات
الرئيسية » خدمات الموقع » وظائف » إيه الوظائف اللي ممكن تشتغلها على الإنترنت وتضمن لك حياة كريمة؟

إيه الوظائف اللي ممكن تشتغلها على الإنترنت وتضمن لك حياة كريمة؟

onlineالشباب اللي بيدور على شغل، أرجوكم فكروا في وظائف ممكن تشتغلوها على الإنترنت، بدون ما يكون عندك مدير يقرفك، وبدون ما تصحى كل يوم الصبح بدري، تشتغل وقت ما انت عايز، ومن أي مكان ومن أي بلد وتقبض بالعملة الصعبة. فيه وظائف كتير أكتر مما تتخيلوا تقدروا تشتغلوها عبر الإنترنت وتكسبوا منها رزق كريم. خد عندك على سبيل المثال:

* الكتابة بكل أنواعها (كتابة روايات، كتابة صحفية، كتابة مقالات، كتابة محتوى لمواقع إلكترونية، أبحاث، الخ)
* التدقيق والتصحيح اللغوي، وإعادة الصياغة
*الترجمة التحريرية (ترجمة أشياء مكتوبة) لو بتعرف أي لغتين، من أي لغة لأي لغة
* الترجمة الشفوية، دلوقتي فيه جهات بتدفعلك بالساعة وتعمل كونفرس كول أو فيديو كول وتترجم كلام شخص انت عارف لغته لشخص آخر بيتكلم لغة أخرى، وانت قاعد في اي مكان.
* ممكن تشتغل خدمة عملاء على موقع أي شركة. بالظبط زي ما بترد على استفسارات العملاء على التليفون، بترد عليهم بس من خلال الشات بالكتابة النصية على موقع الشركة.
* تطوير وتصميم وصيانة مواقع إنترنت
* إدارة مواقع إنترنت
* تطوير تطبيقات للموبايل
* تطوير برامج وألعاب
* التسويق الإلكتروني بكل أنواعه (الإعلانات، تسويق منتج الغير مقابل عمولة، الخ)
* التجارة الإلكترونية بكل أنواعها
* السمسرة والوساطة في أي مجال، إنك توصل بائع لمنتج معين إلى مشتري يريد نفس المنتج مقابل عمولة
* إنك تملك منتج من صنع إيديك وتبيعه على الإنترنت، تقريبا أي حاجة ممكن تبيعها على النت، لو عندك حتى طيارة تقدر تبيعها على النت.
* إجراء استبيانات وأبحاث سوقية
* إجراء أبحاث على الإنترنت حول موضوعات معينة (خاصة لطلاب الجامعات وطلبة الدراسات العليا)
* تصميمات الجرافيك بكل أنواعها
* التصميمات الهندسية والمعمارية وتصميمات الديكورات
* عمل فيديوهات ومنتجة الفيديوهات
* تصميم الشروحات presentations
* التفريغ الصوتي، بمعنى إن فيه ملف فيديو أو ملف صوتي تفرغ الكلام اللي فيه بشكل مكتوب.
* التعليق الصوتي أو الإلقاء الصوتي، يعني لو ليك صوت فخيم ورخيم زي صوت الناس اللي في الإعلانات التلفزيونية أو الأفلام الوثائقية، فدا ممكن يكسبك أحلى فلوس، وأهي دي حاجة ممكن تكون تملكها وانت مش واخد بالك منها أصلا.
* الرسم بكل أنواعه
* الناس الخطاطين
* التصوير الفوتوغرافي وبيع صورك على الإنترنت، فيه صور دلوقتي بتتباع بآلاف الدولارات
* المحاسبة وتدقيق الكشوفات الحسابية
* تقديم الاستشارات بكافة أنواعها، استشارات مالية، استشارات قانونية، وتسويقية الخ، ومنها إعداد خطط تجارية للمشاريع، وكذلك استشارات في أي مجال انت تعرفه، حتى استشارات عاطفية، حتى استشارات حول أفضل الأماكن السياحية انت روحتها قبل كدا، فيه ناس كتير والله عندها استعداد تدفعلك عشان دا وحاجات تانية أتفه من كدا.
* الشغلانات الإدارية زي إرسال إيميلات، أو إدخال بيانات الخ.
* شغلانات الـ IT المتقدمة زي بناء الشبكات وأمن المعلومات الخ.
وأشياء أخرى كثيرة ممكن تشتغلها عن طريق النت.
طبعا أهم سؤال ممكن تفكر فيه، فين ألاقي الشغلانات دي. خد عندك أهم المواقع للناس اللي عندهم خبرات في المجالات المذكورة وغيرها:
* موقع www.upwork.com
* موقع www.freelancer.com
* موقع http://www.guru.com

طبعا فيه مواقع كتير تانية، بس أنا بأعطيك أشهرها وأوثقها.
ممكن تقولي طيب أنا معنديش خبرة في أي مجال من المجالات دي. أقولك عندي طلبك، فيه شغلانات مش محتاجة أي خبرة، خش على الموقع التالي:
* موقع www.fiverr.com
هتلاقي فيه أعبط وأبسط الشغلانات في العالم ممكن تعملها مقابل خمسة دولار في المرة الواحدة. فيه شاب مصري ساكن جنب الأهرامات، فعرض خدمة إنه يكتب أسماء أشخاص أو رسالة لأي شخص على ورقة ويقف بيها قدام الأهرامات ويخلي حد يصوره ويبعت الصورة للشخص اللي طالب الخدمة. الواد دا عمل آلاف الدولارات بالطريقة دي. هتلاقي مثلا خدمات مثل إنك تشتغل مستمع لشخص عايز يدردش معاك في أي موضوع لمدة نصف ساعة أو ساعة. وخدمة إنك تكتب لحد أجنبي اسمه بالعربي بخط جميل، وحاجات تانية أبسط من البساطة والله. بس انت اتحرك.

عارف ممكن حد يقول يا عم كل المواقع دي بالإنجليزي وأنا ميحة في الإنجليزي. عندي طلبك، فيه مواقع عربية شبيهة باللي فوق نفذها ناس عرب وهي مواقع ناجحة وموثوقة، مثل الآتي:
* موقع خمسات https://khamsat.com
* موقع أي خدمة https://ikhedmah.com
* موقع مستقل https://mostaql.com

وكل المواقع المذكورة أعلاه هي مواقع محترمة وآمنة وتحفظ حقوق البائع والمشتري، فهي تقوم بدور الوسيط مقابل رسوم معينة من قيمة كل صفقة.

روح ادخل على كل المواقع وتصفحها كويس وشوف إيه الحاجات اللي ممكن تلاقي نفسك فيها، حتى لو متعرفهاش ابدأ اتعلمها، واقرأ كتب فيها، وخد دورات، هتلاقي دورات مجانية على يوتيوب وغيره. وعشان يبقى الموضوع متكامل، خد أهم المواقع اللي بتقدم دورات مجانية ومدفوعة على الإنترنت:
* موقع http://www.udacity.com
* موقع http://www.udemy.com
* موقع www.coursera.org
* موقع https://ar.alison.com (به نسخة عربية)

يا جماعة فيه الآلاف من المصرين والعرب بيكسبوا رزقهم من على الإنترنت وبيعملوا فلوس كويسة جدا. المهم تتحرك تبدأ وتعلم نفسك ويكون عندك تفاؤل، والباقي كله على الله. الإنترنت هو المستقبل، بل أصبح بالفعل هو الحاضر، بيخليك تتعامل مع زباين من كل دول العالم بلا أي قيود، وتبقى مدير نفسك، وتشتغل في الوقت اللي انت عايزه، ومن المكان اللي انت عايزه وبالشروط اللي توافق عليها.
الله يوفق الجميع.

منقول من صفحة الفيسبوك للأستاذ waleed.abutabikh

اضف رد

لن يتم نشر البريد الإلكتروني . الحقول المطلوبة مشار لها بـ *

*